"Kalaşnikov"dan skripka kimi istifadə edən əsgərimiz

MARAQLI
11:45
4 May 2021
89

Məşhur Azərbaycan əsilli fransalı fotoqraf Reza Deqati vaxtilə Şuşada çəkdiyi bir fotonu paylaşıb.

Sabah.az xəbər verir ki, məşhur fotoqraf öz feysbuk səhifəsində fotonun tarixçəsi və o günlər barəsindəki xatirələrini yazıb:

“Şuşa 1992.

Şuşadakı son jurnalist idim. Rusiyanın hərbi yardımı və ağır texnika vasitəsilə erməni qüvvələrinin mühasirəyə aldıqları şəhəri  işğalından bir az əvvəl tərk etməli idim.

Birinci Qarabağ müharibəsini işıqlandırdıqdan sonra anladım ki, Azərbaycanın peşəkar ordusu yox idi, döyüşçülərin çoxu könüllü və ya polis idi. Mülki şəxslər də Qarabağı qorumaq üçün birləşmişdilər. Vəziyyət çox gərgin və tələfatlar çox yüksək olsa da, öz daimi işlərini tərk edən və Azərbaycanın hər yerindən gəlmiş müdafiəçilərin yüksək ruhu məni heyrətləndirirdi.

Bir gün skripkasını cəbhəyə gətirən bu virtuoz skripkaçı ilə tanış oldum. Atəş nəticəsində skripkası sınmışdı, lakin yayı qalmışdı və həmin skripkaçı öz "Kalaşnikov"undan istifadə edərək bəzi melodiyalar ifa etdi.

Azərbaycanlılar çox yaxşı musiqiçidirlər. Mən Parisə qayıtdım və Qarabağda çəkdiyim şəkilləri azərbaycanlıların davam etməkdə olan faciəsinə, bir milyon qaçqının mövcudluğuna, minlərlə mülki şəxsin qətlə yetirilməsinə göz yummağa qərar verən media üçün gətirdim”, - deyə R.Deqati qeyd edib.

Xəbər lenti