Bu il ilk dəfə IV qrupda “tibb bacısı işi” ixtisası üzrə qəbul elan edilib.

Sabah.az xəbər verir ki, bunu Dövlət İmtahan Mərkəzinin Direktorlar Şurasının sədri Məleykə Abbaszadə bildirib. O qeyd edib ki, bu ixtisas əvvəllər orta ixtisas təhsili müəssisələrində olurdu: “Amma hər bir tibb müəssisəsində yüksək ixtisaslı tibb bacısı tələb olunur. Ona görə də bu ildən bu ixtisasa 40 yer verilib”.

Bu il həmçinin biotexnologiya  ixtisasına da yer ayrılıb. Bu ixtisasa IV qrupda cəmi 30 yer var:

“Bu, çox müasir və gələcəkdə perspektivi olan ixtisasdır. COVİD-19 müalicəsində də biotexnologiya ixtisaslı şəxslər çox çalışıb. İctimai səhiyyə də yeni yaradılıb, çox vacib ixtisasdır. Bu ixtisasa 85 yer ayrılıb. Tibb ixtisası üçün bu il ümumilikdə 610 yer ayrılıb. Tibb Universitetindən əlavə 100 yer Seçenov adına Moskva Tibb Universitetinə də ayrılıb, Naxçıvan Tibb Universitetinə də yerlər verilib”.

M.Abbaszadə həmçinin qeyd edib ki, bu il üçün IV qrup üzrə plan yerlərinin sayı 4 100 yer təşkil edir. Ötən il bu rəqəm 3 710 olub. Bu il üçün 390 yer artım olub ki, bu da 10.5 faiz təşkil edir:

“Bununla da keçən illə müqayisədə müsabiqə vəziyyəti aşağı düşə bilər. Bu qrup üzrə 1 022 nəfər 500-550 bal nəticə göstərib və onların da hamısı qəbul ola bilərlər”.

M.Abbaszadə qeyd edib ki, 560 baldan yuxarı nəticə göstərənlərin dövlət sifarişli yerlərə qəbul olma şansları yüksəkdir.