“15 gün karantin əvəzinə bizi evə yola salırlar” - Həkimlərdən etiraz
Sabah.az xəbər verir ki, bu barədə ATU-nun Tədris Cərrahiyyə Klinikasında koronavirusla mübarizədə aktiv fəaliyyət göstərən, 2 aydır burada çalışan həkim-yazıçı Məlahət Hümmətqızı yazıb. Sosial şəbəkə vasitəsilə etiraz edən həkimlər evlərinə, ailələrinə virus aparmaqdan, yaxınlarını yoluxdurmaqdan qorxurlar:
"Həkimlər evə getmək istəmir. Evinə, ailəsinə virus aparmaqdan, ailəsini, övladını yoluxdurmaqdan qorxur. Qaydalara əsasən, həkim 15 gün oteldə karantində qalmalıdır. Bu ilk günlər aprel ayında belə idi. Həkim 15 gün işləyib, 15 gün karantində qalırdı. Amma may ayının əvvəlində vəziyyət dəyişdi. Bildirildi ki, həkim 1 həftə də karantində qala bilər. May ayının sonunda isə artıq həkimə karantin lazım deyil, evə gedə bilər - dedilər. Vəziyyətin bu hala gəlib çıxması həkimlərdə, xüsusilə yeni işləməyə gələn həkimlərdə inamsızlıq yaratdı. Ailələri üçün təlaş keçirtdilər. Əgər doğrudan da həkimə karantin müddəti lazım deyildisə, onda nə üçün əvvəldən 15 gün həkimlər karantində saxlanılırdı? Həkimlərimizə yaxma verdikdən sonra cavab mənfi çıxarsa oteli tərk etmək tapşırığı verilib. Həkimlərsə etiraz edir. Görəsən, onları eşidən, duyan, kömək əlini uzadan olacaqmı?".
Daha çox