"Bu, ölüm-dirim oyunudur" - "Qarabağ"ı Kiprdə nə gözləyir?

İDMAN
16:41
7 Noyabr 2019
48

Bu gün Avropa Liqasının qrup mərhələsində 4-cü turunda "Qarabağ" səfərdə APOEL-lə qarşılaşacaq. Bakıdakı matçda hərəyə bir xal qazanan bu iki komandanın növbəti oyunu maraqla gözlənilir.Dörd turdan sonra 4 xalla ikinci pillədə qərarlaşan Ağdam klubu qrupdan çıxmaq üçün növbəti vacib oyuna çıxacaq.

Sabah.az xəbər verir ki, AFFA Məşqçilər Komitəsinin üzvü Ağasəlim Mircavadov Qol.az-a açıqlamasında səfərdəki qələbənin çox məsələləri həll edəcəyini deyib:

“Qarabağ” qələbə qazansa, daha yaxşı olar. Komanda elə bir vəziyyətə gəlib ki, bu oyunda tələsmək lazım deyil. Düşünürəm ki, həm də böyük işgüzarlıq da lazımdır. APOEL göstərdi ki, hər kiçik səhvdən məharətlə istifadə edir. Gərək belə səhvlər etməyək. “Qarabağ” öz oyununu oynamalıdır. Bir az da cəld və təmkinli olmalıdır. Bakıdakı oyunda çox qol vəziyyətləri yaratdıq, amma istifadə edə bilmədik. Səfərdəki qələbə çox məsələni həll edir. Bu oyundan çox şey asılıdır ki, klub hansı yolla davam edəcək”.

O bildirib ki, komanda üzvlərinin fikirləri tamamilə oyunda olmalıdır: “Qrupdakı bütün oyunlar vacibdir. Yaddan çıxarmayaq ki, qarşıda bizim “Sevilya” və “Düdelanj”la oyunlarımız var. Biz Lüksemburq komandasıyla evdə oynayacağıq, APOEL isə səfərdə oynayacaq. “Sevilya”nı onlar qəbul edəcək, biz isə səfərə gedəcəyik. Qrupdakı bütün oyunlar sonuncu oyun sayılır. Demək olmaz ki, bu oyun bütün məsələləri həll edir. Amma vacib oyundur. Ümumiyyətlə, avrokuboklardakı hər matc bizim üçün önəmlidir. Belə baxanda, “Qarabağ” bu mövsüm Kipr təmsilçisi ilə 3 dəfə qarşılaşıb. İki oyun Çempionlar Liqasının təsnifat mərhələsində, 1-i isə qrupda. Məncə, hər 3 qarşılaşmada da “Qarabağ” oyun olaraq üstün olub. Futbolçuların fikirləri tamamilə oyunda olmalıdır. Çünki onlar kiçik səhvlərimizdən yaxşı istifadə edirlər”.

AFFA Məşqçilər Komitəsinin digər üzvü Şahin Diniyev isə bu matçı ölüm-dirim oyunu adlandırıb: “Hər bir azarkeşə, futbol adamına bəllidir ki, bu, ölüm-dirim oyunudur. Qarşıda hələ 2 turun olmasına baxmayaraq, qrup ikinciliyi uğrunda bu 2 komanda yarışır. Mənə elə gəlir ki, bu oyun Şekspirin " olmaq, ya da olmamaq" sualına cavab verəcək. Bu cəhətdən çox vacib oyundur. "Qarabağ"a qrupdan çıxmaq üçün bu matçda heç-heçə bəs edir. Çünki sonuncu turda evdə "Düdelanj"a qalib gəlsə, yetərincə xal artımı olacaq. "Qarabağ" ehtiyatlı oynamalı, daha çox etibarlı müdafiə qurmalıdır. Öz xoşbəxtliyini, şansını əks-hücumlarda axtarmalıdır. Qalan şeyləri komanda özü yaxşı bilir. APOEL də bu oyunun mahiyyətini dərk edir. Onlara qələbə lazımdır. Bunun üçün çox çalışacaqlar. "Qarabağ" bu gərginlikdən istifadə etməlidir. APOEL qələbə qazanmaq üçün irəli gedib qol vurmağa çalışacaq. "Qarabağ" da bundan istifadə etməlidir.”.

53 yaşlı mütəxəssis bildirib ki, komanda taktiki cəhətdən ağıllı oynamalıdır: “Ümumiyyətlə, futbolda bütün qollar səhvlərdən sonra vurulur. Səhv olmasa, qol olmaz. Burada topa nəzarət sistemi ikinci plana keçir. Baxırıq ki, topa nəzarət faiz etibarilə 78-in 22-yə olduğu halda, 22 faiz top saxlayan komanda sonda qalib gəlir. Bu tendensiya artıq yığışılıb. Taktiki cəhətdən ağıllı oynamaq lazımdır. Bu oyunda uğur hər bir komandanın öz əlindədir. Bu qarşılaşma hər şeyi həll edə bilər. Sadəcə sonrakı oyunlarda təsadüflərə ümid etmək olar. Ancaq təsadüflər də həmişə həqiqət olmur”.

Xəbər lenti