Milli Məclisin GUAM Parlament Assambleyasındakı nümayəndə heyətinin rəhbəri Elnur Allahverdiyev olacaq.

Sabah.az xəbər verir ki, E.Allahverdiyev bununla bağlı Feysbuk hesabında məlumat verib:

“Hər bir beynəlxalq təşkilatda fəal iştirak, Azərbaycanın milli maraqlarının təbliği, Ermənistanın Azərbaycana qarşı hərbi təcavüzü nəticəsində torpaqlarımızın işğalı kimi faktların beynəlxalq ictimaiyyətə çatdırılması qarşımızda duran başlıca vəzifə olmalıdır. Prezidentimiz cənab İlham Əliyev hesab edir ki, bu məqsədlərin reallaşdırılması üçün müdafiə deyil, daima aktiv hücüm diplomatiyasından istifadə etməli və düşmənə qarşı bütün çoxmillətli müstəvilərdə effektiv mübarizə nümayiş etdirməliyik. GUAM PA-nın da belə regional təşkilatlardan olduğunu nəzərə alaraq qeyd olunan istiqamətlərdə səylərimizi əsirgəməyəcəyik!”.

Xatırladaq ki, E.Allahverdiyev Milli Məclisin Parlamentlərarası İttifaqdakı nümayəndə heyətinin də üzvüdür. Nümayəndə heyətinə Milli Məclis sədrinin müavini Adil Əliyev rəhbərlik edir. E.Allahverdiyev eyni zamanda, Azərbaycan-Çexiya parlamentlərarası əlaqələr üzrə işçi qrupunun rəhbəridir.

Qeyd edək ki, indiyədək GUAM Parlament Assambleyasındakı nümayəndə heyətinə millət vəkili Azər Kərimli rəhbərlik edib.