Bakı şəhər Nərimanov rayonu Ceyhun Hacıbəyli küçəsində yerləşən futbol meydançasında yeniyetmələr arasında kütləvi dava-dalaş olub.

Sabah.az “Qafqazinfo”ya istinadən xəbər verir ki, C.Hacıbəyli küçəsi 28 ünvanında yerləşən davada 2010-cu il təvəllüdlü R.Məhərrəmli və 2011-ci ildə anadan olmuş Ü.Zeynalzadə döyülüblər. Onlar tibbi yardım göstərildikdən sonra evə buraxılıblar.

Hadisə vaxtı hər iki yeniyetmənin tanımadıqları 3-4 nəfərin hücumuna məruz qaldıqları və dava-dalaş zamanı xəsarət aldıqları bildirilib.

Faktla bağlı Nərimanov RPİ-nin 18-ci Polis Şöbəsində araşdırma aparılır.

***

DİN-in mətbuat xidmətinin əməkdaşı Nurlan Əliyev bildirib ki, yeniyetmələr arasında futbol meydançasının ətrafında baş verən dava ilə bağlı polis orqanında araşdırma aparılır:

“Xəsarətlərin dərəcəsini müəyyən etmək məqsədi ilə müvafiq ekspertiza təyin olunub. Hadisənin digər iştirakçılarının da müəyyən edilərək barələrində qanunamüvafiq tədbirlərin görülməsi təmin olunacaq”.