Gürcüstanla sərhəddə Qazax rayonunun ərazisində yerləşən “Qırmızı körpü” və Balakən rayonunun ərazisində yerləşən “Mazımçay” qəbul-çeşidləmə məntəqələrində Azərbaycan ərazisinə keçən ümumilikdə 156 nəfər müayinədən keçirilib.

Sabah.az xəbər verir ki, Fövqəladə Hallar Nazirliyinin yayımladığı məlumata əsasən, müayinədən keçənlərdən 28 nəfərdə şübhəli əlamətlər aşkar edildiyindən həmin şəxslər dəqiq diaqnoz qoyulması məqsədilə xüsusi ayrılmış müvafiq yerli xəstəxanaya göndərilib, digər şəxslərin karantin rejimində qalması təmin olunub.

Həmçinin, çadırlarının sayı 20-dən 60-a, çarpayılarının sayı 300-ə çatdırılan “Qırmızı körpü” və 20 çadır, 100 çarpayıdan ibarət olan “Mazımçay” qəbul-çeşidləmə məntəqələrində normal yaşayış üçün hər cür şərait yaradılıb, sanitar-gigiyenik tələblər tam təmin olunub, qidalanma, çadırların isidilməsi, gigiyenik vasitələrlə təchizat və s. ilə bağlı bütün lazımi tədbirlər həyata keçirilib.

Xatırladaq ki, Fövqəladə Hallar nazirinin müavini Tapdıq Əmiraslanov ötən gün adıçəkilən qəbul-çeşidləmə məntəqələrində olub, görülən işlərlə yerində tanış olub, müvafiq tapşırıqlar verib.