Azərbaycan Texniki Universitetinin (AzTU) Energetika və avtomatika fakültəsinin itkin düşmüş 3-cü kurs tələbəsi tapılıb.

Sabah.az xəbər verir ki, bu gün səhər saatlarında İ.Hüseynov sosial şəbəkə hesabında artıq evdə olduğuna dair paylaşım edib:

"Hamıya salam. Artıq evdəyəm. Keçən bu çətin 7 gün içində məni axtaran və bu mövzuda ailəmin yanında olan hərkəsə təşəkkür edirəm. Hər şeyin bundan da yaxşı olması diləyi ilə".

DİN-in Mətbuat xidməti də tələbənin tapıldığını təsdiqləyib. Bildirilib ki, itkin düşən İlkin Hüseynov dünən axşam saatlarında polis əməkdaşları tərəfindən Bakıda parkların birində tapılıb:

“O, aidiyyatı üzrə əvvəlcə Şabran rayon Polis Şöbəsinə və daha sonra ailəsinə təhvil verilib”.

Qeyd edək ki, İlkin sonuncu dəfə mayın 11-də saat 14:40-da Bakıdan yaşadığı Şabrana gedərkən nənəsi ilə danışıb, Siyəzən rayonu ərazisində yerləşən Xızır Zində pirinin yaxınlığında olduğunu bildirib və 20 dəqiqəyə evə çatacağını deyib. Bundan sonra ona zəng çatmayıb.