“Rəsmi Bakı 7 rayonun eyni vaxtda geri qaytarılmasını tələb edirdi” - Paşinyan

GÜNDƏM
12:59
14 Aprel 2021
130

Ermənistan Baş naziri Nikol Paşinyan bu gün keçirilən parlament iclasında Qarabağda müharibənin qızğın vaxtında, xüsusən Təhlükəsizlik Şurasının 19 oktyabr iclası və Rusiya Prezidenti Vladimir Putinlə telefon danışığı zamanı gedən müzakirələrin bəzi təfərrüatlarını açıqlayıb.

Sabah.az “Sputnik Ermənistan”a istinadən xəbər verir ki, onun sözlərinə görə, artıq oktyabrın ikinci yarısında separatçıların “başçı”sı Arayik Arutyunyan və Ermənistan Silahlı Qüvvələrinin Baş Qərargahı ilə məsləhətləşmələr aparıb, vəziyyəti təhlil edərək ağır güzəştlər daxil olmaqla kapitulyasiyaya getmək qərarı verib.

Paşinyan bildirib ki, bu məqsədlə, parlamentin müxalifəti nümayəndələrinin də qatıldığı Təhlükəsizlik Şurasının iclasını çağırıb. Həmin görüşdə Ermənistan Prezidenti və Bütün Ermənilərin Katolikosu da iştirak edib.

İclasdan sonra Rusiya Prezidentinə zəng etdiyini açıqlayan Paşinyan, Ermənistanın keçmişdə vasitəçilər tərəfindən dəfələrlə təklif olunan 5+2 formuluna əsasən bölgələrin Azərbaycana qaytarılması şərti ilə sülh istədiyini bildirib.

“Vəziyyəti Rusiya Prezidenti ilə ətraflı müzakirə etdik və tam bir razılaşma əldə etdik. Bilirsiniz ki, azərbaycanlı qaçqınlarla bağlı bir məsələ var idi. Dedim ki, bu məsələ bir növ Dağlıq Qarabağın statusunun müəyyənləşdirilməsi prosesi ilə əlaqəlidirsə, bu məsələyə dair heç bir etirazımız yoxdur”, - deyə Paşinyan qeyd edib.

Bundan sonra Prezident İlham Əliyevlə telefon danışığı aparan Rusiya Prezidenti Vladimir Putin Bakının Hadrut bölgəsini qaytarmaq tələbini qəti şəkildə rədd etdiyini və eyni zamanda, Şuşa da daxil olmaqla qaçqınların qayıtmasından asılı olmayaraq Qarabağın statusu məsələsinin qaçqınlar məsələsi ilə əlaqələndirilməməsini tələb etdiyini bildirib.

Bundan əlavə, Paşinyan bildirib ki, rəsmi Bakı yeddi rayonun 5 + 2 formulu ilə deyil, hamısının eyni vaxtda geri qaytarılmasını tələb edib. Baş nazir bunun yeni bir detal olduğunu, əvvəllər bu barədə danışmadığını söyləyib. Qeyd edib ki, Azərbaycan Dağlıq Qarabağın statusu məsələsinin gündəliyə salınmasına da qəti şəkildə qarşı çıxıb.

 

Xəbər lenti