Vətən müharibəsində qəhrəmancasına şücaət göstərən igidlərimizdən biri də şəhid kapitan Həmidağa Hüseynzadədir.

Sabah.az xəbər verir ki, "Xəzərxəbər" Hüseynzadələr ailəsinin evində olub. Reportajda bildirilib ki, H.Hüseynzadə 2016-ci il Aprel döyüşləri zamanı Lələtəpə yüksəkliyinin düşməndən azad edilməsində xüsusi qəhrəmanlıq göstərib. Həmidağanın bu şücaətinə ən yüksək dəyər isə Ali Baş Komandan İlham Əliyev tərəfindən verilib. Medalla təltif edilən Həmidağa həmin gündən öz dəstəsinin kapitanı olub.

Xüsusi təyinatlımız olan Həmidağa Hüseynzadə adını Vətən müharibəsi səhifələrinə də qızıl hərflərlə yazdırmağı bacarıb. O, öz dəstəsi ilə Murov dağ silsiləsi istiqamətində düşmənin "Canavar qulağı" adlı 2 postunu ələ keçirib. Ermənilərin xeyli sayda canlı qüvvəsini məhv edən qəhrəmanımız həmin ərazidə düşdükləri mühasirəni də yarmağı bacarıb. Düşmənin snayperdən açdığı atəşə tuş gələn kapitanımız döyüş yoldaşının qollarında şəhadətə yüksəlib.