“National Geografic” jurnalının tanınmış fotojurnalisti, Azərbaycan əsilli fransız fotoqraf Rza Diqqəti bu dəfə Kəlbəcərdən fotosessiya paylaşıb.

Sabah.az xəbər verir ki, o, çəkdiyi şəkilləri İnstaqram hesabında yayımlayıb. Deqati fotoları belə şərh edib:

"Kəlbəcərin əbədi gözəlliyi... Kəlbəcər bölgəsi, Qarabağ, Azərbaycan... Hər şey böyük bir sürprizlə gəldi. Dağın keçidinə çatdıqda, 3.840 metrdə Kəlbəcərin nəfəs kəsən gözəlliyi məni heyran etdi.

Azərbaycan əsgərlərinin keşikdə olması mənə müharibəni və bu bölgəni erməni silahlı qüvvələri tərəfindən 30 illik faciəvi işğalın sonunu xatırlatdı. 1993-cü ildə on minlərlə mülki şəxs qaçqın vəziyyətinə gətirildi. Soyuq bir qışda bu keçidləri keçməyə məcbur oldular, bir çox hallarda erməni əsgərləri qadınların üstündəki qızıl və digər əşyaları alırdılar. Onlar sağ qalmaq üçün dağdan keçməli idilər, çılpaq ayaqları ilə bunu etmək ölüm hökmü idi. Bir çox qaçqın ayaqlarını donduraraq təhlükəsiz yerə gəldi.

Bu yaxınlarda bölgə azad edildi və ermənilər işğal altındakı torpaqları oradakı evləri, meşələri yandıraraq, təbiəti məhv edərək, heyvanları öldürərək tərk etdi.

Bu gün bu dağda bütün bunları unutmağı və yalnız ana təbiətin əbədi gözəlliyinə baxmağı istəyirdim".